ПОСЛЕДНИОТ ДЕН ОД „РЕФЕРЕНДУМОТ“ Западното разузнавање: Еве кога Путин ќе прогласи АНЕКСИЈА НА ОКУПИРАНИТЕ ПОДРАЧЈИ ВО УКРАИНА
Претставниците на изборните комисии на сите овие украински региони веќе ги прогласија референдумите за валидни, бидејќи, според нив, излезноста веќе надминала 50 отсто од регистрираните гласачи, пренесува Тас с.
Се наведува дека досега 86,89 отсто од регистрираните гласачи гласале на територијата на ДНР, 83,61 отсто во ЛНР, 63,58 отсто во регионот Керсон, додека изборната комисија на областа Запорожје пријавила излезност од 66,43 отсто.
Градоначалникот на Доњецк, Алексеј Кулемзин, вчера изјави дека украинските сили целеле цивили во Доњецк во 115 одделни напади во првите три дена од референдумот, јави телевизијата „Русија-24“.
Кулезмин додава дека пет од девет области во градот страдаат од украински напади.
Гласањето за приклучување кон Русија започна во петокот во тие региони и се очекува да заврши денеска, а рускиот парламент би можел да го одобри пристапувањето во рок од неколку дена.
Киев и повеќето земји ги отфрлија овие референдуми и ветија дека нема да ги признаат нивните резултати, објави претходно Ројтерс.
Британското Министерство за одбрана го објави најновиот разузнавачки извештај за ситуацијата во Украина. Во него се наведува дека рускиот претседател Владимир Путин треба да се обрати во рускиот парламент во петок, на 30 септември, и дека „постои реална можност Путин да го искористи тоа обраќање за формално да ја објави анексијата на окупираните региони на Украина“.
Руските лидери се надеваат дека најавата за анексија на окупираните територии ќе се смета за успех на „специјалната воена операција“ (како што официјална Москва ја нарекува инвазијата на Украина) и ќе ја консолидира јавната поддршка за конфликтот, се вели во извештајот.
Но, таа надеж најверојатно ќе биде поткопана од свеста на руската јавност за неодамнешните порази од руските сили на фронтот и значителните немири предизвикани од најавата за делумна мобилизација, според британското воено разузнавање.