Во армијата ќе бидат регрутирани главно поранешни офицери и луѓе поврзани со руската армија. Тоа значи продолжување на воените операции на украинска територија со уште поголем интензитет. Ова го изјави поранешниот заменик министер за одбрана Јордан Божилов за БТВ по повод делумната воена мобилизација во Русија, која ја најави претседателот Владимир Путин .

„Она што исто така го најави Путин е транзиција на индустриската база на Русија во воена состојба. Се бара производство на повеќе оружје. Очекувам уште пожестока војна од сега па натаму“, додаде тој.

Божилов рече и дека Русија се подготвува да ги признае веќе окупираните региони Доњецк, Луганск, Херсон и Запорожје како дел од својата територија.  

„Неколку пати Путин спомна дека има нуклеарно оружје и најави дека сите сили ќе бидат употребени не само против „нацистите“ (како што тој ја дефинира владата во Украина), туку и против сите други сили кои би се осмелиле да и се спротивстават на руската армија и да ги загрози руските територии“, додаде тој.

За време на неговото обраќање до Русите, претседателот Путин рече дека доколку постои закана за територијалниот интегритет на Русија и нејзиниот народ, Москва ќе ги користи сите расположливи средства за одбрана, вклучително и нуклеарно.

„Ова не е блеф“, рече шефот на државата, зборувајќи за можноста за употреба на нуклеарно оружје.