АМБАСАДАТА на Србија во Скопје денеска изрази длабока загриженост во врска со изјавата на вицепремиерот на Северна Македонија задолжен за добро владеење, Арбен Фетаи, по повод 26-годишнината од агресијата на НАТО врз Сојузна Република Југославија, која „не придонесува за градење меѓусебно почитување меѓу двете земји“.

Во соопштението се нагласува дека изјавата на Фетаи дека агресијата на НАТО е „историски момент“ што „го отвори патот за мир и стабилност во регионот“ и „запирање на геноцидот“ длабоко влијае на чувствата на српските граѓани, за кои 24 март претставува симбол на големото страдање и почеток на еден од најтрагичните периоди во поновата историја на Србија и на српскиот народ.

Се потсетува дека во текот на 78 дена континуирано бомбардирање, животот го загубија околу 2.500 цивили, меѓу кои десетици деца, додека повеќе од 6.000 луѓе беа ранети.

Исто така, се наведува дека за време на агресијата биле уништени мостови, болници, училишта, фабрики и културни имоти, а многу семејства ги загубиле своите најблиски, домовите и чувството на сигурност. 

– Сеќавањата за тогашните настани и страдањата на населението се длабоко врежани во колективната свест на нашиот народ, а болката и последиците од тој период се живи и денес. Затоа секој обид за релативизирање или позитивно толкување на овие настани се доживува како болно и несоодветно понижување на жртвите и нивните семејства – велат од Амбасадата.

Тие потсетуваат и дека воената интервенција на НАТО во март 1999 година беше извршена без одлука на Советот за безбедност на Обединетите нации и како таква претставува флагрантно кршење на меѓународното јавно право и принципите на кои се заснова меѓународниот правен поредок. 

Фото: ТВ21/Јутјуб

– Оттука, сметаме дека наративот за предметниот настан, лишен од потребната правна и морална чувствителност, не придонесува за градење меѓусебно почитување во меѓудржавните односи. Имајќи го ова предвид, Амбасадата на Србија во Скопје изразува надеж дека во иднина ќе се води сметка за сложеноста на ваквите теми при јавните настапи, но, што е уште поважно, ќе се покаже доследност во почитувањето на меѓународните правни принципи, наместо нивната селективна примена и толкување – се вели во соопштението.

Амбасадата наведува дека е особено загрижена поради несериозната и неоснована употреба на јазични формулации и правни термини, како што е терминот „геноцид“, чија злоупотреба претставува релативизирање на терминот и навреда за сите вистински жртви на овој најтежок облик на криминал. 

Се нагласува дека самоволната употреба на вакви сериозни квалификации бара посебна одговорност, исправност и претпазливост, особено во регион кој преживеал бројни страдања низ својата историја.

– Во овој контекст, ја користиме оваа прилика уште еднаш да укажеме на нумеричката состојба и условите во кои живее српската заедница на Косово и Метохија, која веќе подолго време се соочува со системски прекршувања на основните човекови права, институционален притисок, физички напади, уништување на културно и верско наследство, па дури и сквернавење на гробови и споменици, се со цел нивно бришење на трагите во оваа област.

Амбасадата нагласува дека Србија останува посветена на негување блиски и пријателски односи со Северна Македонија, како и на зачувување на регионалната стабилност и соработка, но дека подеднакво го задржува правото да ја брани вистината за сопствената историја, како и достоинството на својот народ, најбројниот во овој регион во текот на 20 век.