Молдавија, исто така, се соочува со безбедносна криза, откако десетици илјади жители на Придњестровје, отцепена проруска енклава, останаа без струја и топла вода бидејќи беше прекинат протокот на руски гас низ Украина. Премиерот на Молдавија сега предупредува дека најсиромашната земја во Европа се соочува со тежок период поради ситуацијата во Приднестровје .

Протоците на руски гас низ Украина што ја снабдува централна и источна Европа беа прекинати на крајот на 2024 година, откако Киев одби да го продолжи договорот со Москва.

Молдавскиот премиер Дорин Речан рече дека земјата ќе ги покрие своите енергетски потреби со домашно производство и увоз, но посочи дека сепаратистичкиот регион Придњестровје претрпел болен удар и покрај неговите врски со Москва.

Путин и се заканува на Молдавија преку Придњестровје?
– Со закана за иднината на енклавата што ја поддржува три децении во обид да ја дестабилизира Молдавија, Русија го открива неизбежниот исход за сите нејзини сојузници – предавство и изолација. Ова го третираме како безбедносна криза која има за цел да овозможи враќање на проруските сили на власт во Молдавија и вооружување на нашата територија против Украина, со која делиме граница од 1.200 километри – се вели во соопштението на Речан.

Оваа југоисточна европска земја, инаку најсиромашна, со околу 2,5 милиони жители е во центарот на вниманието по руската инвазија на соседна Украина во време на зголемени тензии меѓу Москва и Западот.

Проевропската претседателка Маја Санду освои втор мандат на изборите минатата година и вети дека ќе ги забрза реформите и ќе ја консолидира демократизацијата.