Бројот на жртвите од разорниот земјотрес што во понеделникот во раните утрински часови го погоди јужниот дел на Турција долж границата со Сирија постојано се зголемува, а спасувачите неуморно копаат низ урнатините во потрага по преживеани.

Хуманитарна помош и спасувачи пристигнуваат од целиот свет, а на социјалните мрежи постојано се појавуваат видеа од спасување, но и трагични сцени по катастрофата што ги снајде овие две земји.

Така, на Твитер е објавено крајно шокантно и вознемирувачко видео од Сирија, на кое спасувачите при ископувањето на урнатините го пронаоѓаат безживотното тело на постар маж целосно покриено со дете.

Како што јави Медја Баскент , се работи за татко и син и за херојскиот подвиг на човек кој го жртвувал животот за да го заштити своето дете со сопственото тело, а сцената се случила во Африн, Сирија.

Во објавите на Твитер се наведува дека таткото го покрил синот со своето тело и на тој начин му го спасил животот на детето. За жал, човекот починал.

Малото момче веднаш било пренесено во болница откако било извлечено со возило на брза помош.

Од минута во минута пристигнуваат вести за разорниот земјотрес, за бројот на жртвите, како и за преживеаните, а за размерите на оваа катастрофа, покрај разорните бројки, секако покажуваат и вознемирувачките сцени од урнатините кои некогаш биле градови. .