Русија заработила 158 милијарди евра од извозот на фосилни горива во првите шест месеци од војната, искористувајќи ги нивните високи цени, се вели во извештајот на независен истражувачки центар објавен денеска. Извештајот бара поефикасни санкции против Москва.

Зголемувањето на цените на фосилните горива значи дека тековните приходи на Русија се многу над оние во претходните години, и покрај падот на обемот на извозот, се истакнува во извештајот на Центарот за истражување на енергија и чист воздух (CREA) со седиште во Финска.

Цените на бензинот се искачија на историски нивоа во Европа, додека цените на нафтата нагло се зголемија на почетокот на војната пред да паднат неодамна.

„Се верува дека извозот на фосилни горива вложи 43 милијарди евра во рускиот федерален буџет, помагајќи да се финансираат воените злосторства во Украина“, проценуваат авторите на извештајот.

Овие бројки се однесуваат на првите 6 месеци од војната по руската инвазија на Украина, или периодот од 24 февруари до 24 август.

За овој период, CREA заклучи дека најголемиот увозник на руска енергија од фосилни горива е Европската унија (вкупно 85,1 милијарди евра), а потоа следат Кина и Турција.

ЕУ одлучи да воведе постепено ембарго за увоз на нафта и нафтени деривати. Заедницата, исто така, веќе ги прекина набавките на јаглен, но рускиот гас, од кој е силно зависен, во моментов не е засегнат.

Сепак, истражувачкиот центар смета дека европското ембарго за јаглен воведено на 10 август веќе вроди со плод, а рускиот извоз оттогаш падна на најниско ниво од инвазијата на Украина. „Русија не успеа да најде други купувачи“, пишуваат авторите на извештајот.

Според истражувачите, треба да се воведат „построги“ правила за да се спречи руската нафта да влезе на пазарите каде што би требало да биде забранета. Во моментов е премногу лесно да се заобиколат западните санкции, се вели во извештајот.

ЕУ треба да ја забрани употребата на европски бродови и пристаништа за транспорт на руска нафта во трети земји, велат експертите. Од Обединетото Кралство, исто така, беше побарано да го забрани својот осигурителен сектор да биде вклучен во таков меѓународен транспорт.

Земјите од Г7 во петокот одлучија „итно“ да стават плафон на цената на руската нафта. тоа е сложен механизам што мора да се воспостави за да се зададе уште еден удар на енергетскиот профит на Москва, забележува АФП.