Германски воен аналитичар: Ако контраофанзивата не успее, тоа ќе биде сигнал до партнерите…

По битката за Донбас, ќе има помал интензитет на војната во која двете страни трошат многу.

Ова го изјави Франц-Штефан Гади, воен аналитичар од Институтот за меѓународни стратегиски студии за порталот на германскиот јавен сервис АРД.

Гади тврди дека предавањето на Лисичанска, ако ја гледаме ситуацијата од воен аспект, не значи многу. Тој вели дека тоа е симболична победа за руските сили, но и дека стратешките последици ќе бидат минимални за продолжување на војната.

„Во Донбас се води војна за трошење ресурси и сили, не се работи толку за освојување поединечни градови, туку за предизвикување на противникот повеќе загуби во работна сила и материјал отколку што има сопствената страна. Можеше да се предвиди дека Лисичанск и Северодонецк ќе паднат порано или подоцна поради големата супериорност на руските сили, особено на артилерија.

Украинските сили се повлекоа тактички – не се бореа, како во Мариупол, до последниот човек, за да не бидат опколени. Ова покажува колку се стратешки важни овие градови, а очигледно во Украина постои идеја тие подоцна да бидат искористени во контраофанзива“, вели воениот аналитичар.

Сега украинските сили се повлекоа во нова, добро зајакната линија на одбрана, воспоставена во Бахмут, Соледар и Северск. Втората одбранбена линија е во близина на Славјанск и Краматорск. Тие два урбани центри се подготвуваат како одбранбени утврдувања од 2014 година.

Огромни загуби

На новинарско прашање каква е состојбата на двете армии по четири и пол месеци војна, аналитичарот вели дека и двете армии се исцрпени од огромни загуби.

„Сега прашањето е кој прв ќе колабира. Краткорочно, изгледа полошо за украинските сили на исток, бидејќи руските сили, кога станува збор за артилерија, имаат огромна предност и немаат проблеми со каналите за снабдување. Во исто време, руските сили во Донбас можат да создадат штит над нивните операции во форма на воздушна одбрана, што е разлика во споредба со првата фаза од војната. Украинското воздухопловство не доаѓа до израз, што за нив е голем недостаток – објаснува Гади.

Русите имаат превласт и во електронското војување, поради што украинската страна само умерено користи беспилотни летала затоа што нивната употреба може да биде попречена по електронски пат. Ова го отежнува извидувањето. Од друга страна, голем недостаток на руската армија е недостатокот на пешадија, елаборира Гади.