Макрон: Нека не се губи надеж! Ќе ги убедам северномакедонците

„Блиску сме до договор кој овозможува правда за бугарските барања и кој е компатибилен со тоа што Северна Македонија може да го направи, потребно е видливост и доверба. Во следните часови ќе има гласање на бугарскиот парламент, ќе гледаме кон бугарскиот претседател и партиите од сегашното мнозинство, опозициските партии“, рече Макрон.

Тој нагласи дека со „Северномакедонците” во следните часови ќе разгледува начин да се склучи договорот, за до идната недела да помине на амбасадорско ниво и да се деблокира процесот.

Макрон посебно ја истакна, како што рече, храброста на поранешниот премиер Зоран Заев, кој го смени Уставот и името на државата.

За Бугарија оцени дека „една земја членка со задоцнување побара промени“ и оцени дека „ЕУ не може да се преправа дека тие бараања не постојат“.

Францускиот претседател истакна дека има политичка криза во Бугарија, но и го пофали премиерот Кирил Петков за, како што оцени, неговата политичка храброст.

Во Брисел, на заедничка прес-конференција со лидерите на Србија и Албанија,македонскиот премиер Димитар Ковачевски го одби предлогот на Франција за преговарачката рамка и рече дека „само договор кој ги почитува црвените линии на државата може да биде прифатен“.